अन्तर्राष्ट्रिय समाचार

मलेरियाको औषधि हाइड्रोक्सिक्लोरोक्वीनकै पक्षमा ट्रम्प, कोरोनाको उपचारमा प्रभावकारी हुने दाबी

काठमाडौँ – विश्व स्वाथ्य संगठन (डब्ल्युएचओ)ले कोरोना भाइरस संक्रमितको उपचारमा प्रतिबन्ध लगाएको मलेरियाको औषधिलाई अमेरिकी राष्ट्रपति डोनाल्ड ट्रम्पले फेरि पनि कोरोनाको उपचारमा प्रभावकारी हुने दाबी गरेका छन् ।

डब्ल्युएचओ र स्वास्थ्य विज्ञहरूले कोरोना भाइरसको उपचारमा हाइड्रोक्सिक्लोरोक्वीनको प्रयोगमा प्रतिबन्ध लगाइरहँदा ट्रम्पले भने फेरि पनि उक्त औषधि संक्रमितको उपचारमा प्रयोग गर्नु पर्ने पक्षमा वकालत गरेका हुन् ।

ट्रम्पले लगातार हाइड्रोक्सिक्लोरोक्वीको प्रयोगले कोरोना भाइरसको संक्रमणबाट जोगिने वा संक्रमण निको हुने बताउँदै आएका थिए । उनले केही समयअघि संक्रमणबाट जोगिनका लागि आफूले सो औषधि खाएको पनि बताएका थिए ।

तर, अमेरिकाकै स्वास्थ्य विज्ञ, डब्ल्युएचओ तथा वैज्ञानिक अनुसन्धानहरुबाट मलेरियाविरुद्धको औषधि कोरोना भाइरसविरुद्धको उपचारमा प्रभावकारी नहुने देखिएको छ ।

यसको प्रयोगले कोरोना भाइरसबाट संक्रमितमा मुटु सम्बन्धी समस्या आउन सक्ने र कतिपय अवस्थामा मृत्युदर बढ्न सक्ने भन्दै परीक्षण बाहेकका अवस्थामा प्रयोगमा रोक लगाएको छ ।

तर, ट्रम्पले भने आफूले सुझाएका कारण कोभिड–१९ को उपचारमा होइड्रोक्सिक्लोरोक्वीनको प्रयोग अस्वीकार गरिएको आरोप लगाएका छन् ।

सामाजिक सञ्जाल ट्वीटरले ट्रम्पका जेठो छोराले हाइड्रोक्सिक्लोरोक्वीको प्रशंसा गरी बनाएको भिडियो पोस्ट गर्न प्रतिबन्ध लगाएको भोलिपल्ट उनको यस्तो भनाई आएको हो ।

अहिलेसम्म भएका अनुसन्धानमा हाइड्रोक्सिक्लोरोक्वीनले कोरोना भाइरसका संक्रमितलाई फाइदा गर्ने प्रमाण भेटिएको छैन । नियामक निकायहरुले यसको प्रयोग मुटु सम्बन्धी समस्याका लागि कारक बन्न सक्छ ।

अनुसन्धान प्रतिवेदनमा यो औषधिको प्रयोगले मुटुको चालमा गम्भीर समस्या आउन सक्ने तथा अरु स्वास्थ्य समस्याहरु पनि हुने देखिएपछि अमेरिकाको फुड एण्ड ड्रग एड्मिनिस्ट्रेसन (एफडीए) ले गएको महिना हाइड्रोक्सिक्लोरोक्वीनको प्रयोग नगर्न सावधान गराएको थियो ।

Related Articles

Back to top button
Close