समाचार

वर्षाका कारण तरकारी आयातमा समस्या, स्थानीय उत्पादनले नधान्दा महंगियो तरकारी

काठमाडौं – यति बेला तरकारीको मूल्य बढेको छ । वर्षादको समय तरकारीको उत्पादन कम हुने तथा उत्पादित तरकारीलाई बजारसम्म ल्याउन यातायात व्यवस्थापनमा अवरोध हुँदा तरकारीको मूल्य बढेको हो ।

विशेषगरी उपभोक्ताले बढी उपभोग गर्ने र अपत पनि हुने तरकारी मध्ये आलु पर्छ । आलुको मूल्य अहिले निकै बढेको छ । करिब एकसाताअघि एकसय २० रुपैँया धार्नी पर्ने आलु अहिले १ सय ८० रुपैँया पुगेको छ ।

हरेक वर्ष यस समय तरकारीको मूल्य बढ्ने कालामाटी फलफुल तथा बजार विकास समितिले जनाएको छ ।

‘स्थानीय स्तरमा नै आलुको उत्पादनमा कमी आएको छ खासगरी मुडे र पालुङको आलु कालीमाटीमा भित्रिरहेको छ’ समितिका सूचना अधिकारी विनय श्रेष्ठले भने, ‘भारतबाट आउने आलु केही दिनदेखि बाटोमै ठप्प भएको छ ।’

निरन्तरको वर्षाका कारण विभिन्न राजमार्गका सडकहरु अवरुद्ध भएकाले भारतबाट तरकारी आउन नसकेको उनले बताए ।

‘केही दिनअघि बाटोमै अड्एिका तरकारी कालीमाटी आइपुग्यो भने भारतबाटै आउनुपर्ने तरकारी अहिले ल्याउन सक्ने अवस्था छैन ।’

तरकारीको मूल्य घट्नका लागि वर्षामा निर्भर रहनु पर्ने अवस्था छ । वर्षा रोकिएमा सबैतिरबाट कालीमाटीमा तरकारी भित्रने र तरकारीको मूल्य ओरालो लाग्ने उनले भनाइ छ ।

तरकारीको खपत बढ्न सकेन

सामान्य दिनमा दैनिक ८ सय टन तरकारीको खपत हुने काठमाडौंमा अहिले ५ सय टन खपत हुन मुस्किल भएको छ ।

कोरोना भाइरस रोकथामका लागि चैत्र ११ गतेदेखि गरिएको लकडाउनमा करिब ४ महिनासम्म कालीमाटीमा ४ सय टनसम्म तरकारी भित्रिएको थियो ।

तर अहिले लकडाउन खुकुलो भएपनि तरकारीको खपत भने बढ्न सकेको छैन ।

लकडाउन भएदेखि तरकारीको खपत बढ्न सकेको छैन’ सुचना अधिकारी श्रेष्ठले खबरहबसँग भने, ‘विगतका वर्षहरुमा यो सिजनमा पनि ८ सय टनसम्म तरकारी भित्रिन्थ्यो तर अहिले ४ सयदेखि ५ सयटनमा खुम्चिएको छ ।’

मूल्य वृद्धि भएका तरकारी

बजारमा अत्याधिक मात्रामा खपत हुने तरकारीको रुपमा रहेको आलुको मूल्य निरन्तर उकालो लागेको छ । करिब एक महिनाको अवधिमा आलुको मूल्य ९७ दशमलव १४ प्रतिशतले बढेको छ ।

समितिको तथ्याङ्कअनुसार गत असार १० गते प्रतिकेजी ३५ रुपैयाँ रहेको आलुको मूल्य साउन १० गते प्रतिकेजी ६९ रुपैयाँ रहेको छ ।

त्यस्तै एकमहिना अघि प्रतिकेजी १२ रुपैयाँ रहेको बन्दा २१६ दशमलव ६७ प्रतिशतले बढेर ३८ रुपैयाँ पुगेको छ । काउली पनि एकमहिना अघि ३३ रुपैयाँ किलो रहेको थियो तर अहिले २४८ दशमलव ४८ प्रतिशतले बढेर १ सय १५ रुपैयाँ पुगेको छ ।

प्रतिशतमा तुलना गर्दा प्राय सबै तरकारी पाँच गुँनासम्म बढेको पाइन्छ ।

मुला ४१६ दशमलव ६७, भन्टा २५४ दशमलव ५५ प्रतिशत, सिमी १३६ दशमलव ३६ प्रतिशत, हरियो साग १३२ देखि १९५ दशमलव ४५ प्रतिशत, च्याऊ ५० प्रतिशत, गोलभेँडा ५५ प्रतिशतले वृद्धि भएको छ ।

त्यस्तै हरियो खुर्सानी ४२७ दशमलव ७८ प्रतिशतले वृद्धि भएको छ ।

यस्तो छ आजको मूल्य सुची

शनिवार कालीमाटी बजारमा गोलभेँडा प्रतिकेजी ३०, रातो आलु प्रतिकेजी ७०, मुडेको आलु प्रतिकेजी ६०, सुकेको प्याज प्रतिकेजी ३३, गाजर प्रतिकेजी ६०, काउली प्रतिकेजी १ सय २० रुपैयाँ रहेको छ ।

त्यस्तै मुला प्रतिकेजी ६५, भन्टा प्रतिकेजी ८०, बोडी प्रतिकेजी ८०, भटमासकोशा प्रतिकेजी १ सय २०, तितेकरेला प्रतिकेजी ३०, परवर प्रतिकेजी १ सय १०, घिरौला प्रतिकेजी ६०, भिण्डी प्रतिकेजी १ सय १०, च्याऊ (कन्य) प्रतिकेजी २ सय र डल्ले च्याऊ ४ सय ५० रुपैयाँ छ ।

त्यसैगरी रायो, पालुगो, चमासुर लगायतका हरियो सागपात प्रतिकेजी ७०, खुर्सानी हरियो प्रतिकेजी ९५ रुपैयाँ छ ।

Related Articles

Back to top button
Close